Dainik Aikya - Published from Satara (Maharashtra,India) Published on,
 
Search Tag:     From Date:     To Date:     Section:    
Total Results: 158
सर्वोच्च न्यायालयाचा ऐतिहासिक निर्णय 5नवी दिल्ली, दि. 13 (वृत्तसंस्था) : सर्वोच्च न्यायालयाच्या सरन्यायाधीशांचे कार्यालय आता माहिती अधिकार कायद्याच्या (आरटीआय अ‍ॅक्ट) कक्षेत आले आहे. सर्वोच्च न्यायालयाने आज (बुधवारी) हा ऐतिहासिक निर्णय दिला. सरन्यायाधीशांचे कार्यालय हे सार्वजनिक प्राधिकरण आहे, अशी टिपणीही न्यायालयाने केली. या शिवाय सर्व न्यायाधीश देखील माहिती अधिकार कायद्याच्या कक्षेत येणार आहेत. माहिती अधिकार कायद्याला आणखी मजबूत करण्याच्या दृष्टीने सर्वोच्च   न्यायालयाचा हा निर्णय महत्त्वाचा आणि मोठा मानला जात आहे. दिल्ली उच्च न्यायालयाने 2010 मध्ये याबाबत दिलेला निर्णय सर्वोच्च न्यायालयाने कायम ठेवला आहे. काही अटींसह सरन्यायाधीशांचे कार्यालय आणि सर्व न्यायाधीश माहिती अधिकार कायद्याच्या कक्षेत आणण्याचा निर्णय न्यायालयाने दिला आहे. पारदर्शकतेसाठी न्यायिक स्वातंत्र्यही ध्यानात ठेवायला हवे, असेही न्यायालयाने हा निकाल देताना स्पष्ट केले.
Thursday, November 14, 2019 AT 09:04 PM (IST)
5नवी दिल्ली, दि. 13 (वृत्तसंस्था) : कृषी मालाला योग्य बाजारभाव मिळण्यासाठी राज्यांनी एपीएमसी बंद करून ई-नाम(इलेक्ट्रॅानिक नॅशनल ऍग्रीकल्चर मार्केट) या व्यवहार पद्धतीचा वापर करावा, असे आवाहन अर्थमंत्री निर्मला सीतारामन यांनी केले आहे. याद्वारे शेतकर्‍यांना चांगला बाजारभाव मिळू शकतो, असेही त्या म्हणाल्या. दिल्लीमध्ये राष्ट्रीय कृषी व ग्रामीण विकास बँकेतर्फे आयोजित कार्यक्रमात त्या बोलत होत्या. शेतमाल विक्री व्यवस्थेमधील पारंपरिक पद्धती बंद करून संगणकीकृत आणि ऑनलाइन लिलावाद्वारे व्यवहार करण्यासाठी केंद्र शासनाने राष्ट्रीय कृषी बाजाराची संकल्पना प्रत्यक्षात आणली आहे. त्यासाठी ई-नाम (इलेक्ट्रॅानिक नॅशनल अ‍ॅग्रीकल्चर मार्केट) हे एक व्यापार पोर्टल ुुु.शपरा.र्सेीं.ळप निर्माण करण्यात आले आहे. याद्वारे देशातील बाजार समित्या व त्यांचे व्यवहार इंटरनेटद्वारे राष्ट्रीय बाजारपेठेशी जोडण्यात आलेले आहेत. देशातील जवळपास 7500 कृषी बाजार समिती ई-नामला जोडण्याची मोदी सरकारची योजना आहे. परिणामी अ‍ॅमेझॉन, फ्लिपकार्ट यासारखा ऑनलाइन प्लॅटफॉर्म शेतकर्‍यांना मिळणार आहे.
Thursday, November 14, 2019 AT 09:02 PM (IST)
पोटनिवडणूक लढवता येणार 5नवी दिल्ली, दि. 13 (वृत्तसंस्था) : कर्नाटकातील 17 आमदारांना अपात्र ठरवण्याच्या सभापतींच्या निर्णयावर सर्वोच्च न्यायालयाने शिक्कामोर्तब केले आहे. मात्र, हे आमदार पुन्हा निवडणूक लढवू शकतात, असा निर्णय न्यायालयाने दिला आहे. या निर्णयामुळे पक्षबदलू आमदारांना दिलासा मिळाला आहे. काँग्रेस-जेडीएसमधून पक्षांतर करून भाजपच्या गोटात सहभागी झालेल्या 17 आमदारांना विधानसभेचे अध्यक्ष रमेश कुमार यांनी अपात्र ठरवले होते. सभापतींनी पक्षांतरबंदी कायद्यांतर्गत या आमदारांवर कारवाई केली होती. या आमदारांना अपात्र ठरवण्यात आल्याने त्यांना विद्यमान विधानसभेची पोटनिवडणूक लढवण्यास प्रचलित कायद्यानुसार मनाई    करण्यात आली होती. त्यामुळे आगामी पोटनिवडणुकीत उमेदवारी अर्ज दाखल करणण्यास हे आमदार अपात्र ठरले होते. निवडणूक आयोगाने 17 पैकी 15 जागांवरील पोटनिवडणुका जाहीर केल्या आहेत. न्यायालयाने या निवडणुकीला स्थगिती देऊ नये, अशी विनंती आयोगाच्या वकिलांनी केली होती. सोबतच या आमदारांना निवडणूक लढवण्यास अपात्र ठरवू नये याची विनंतीही या वकिलांनी न्यायालयाकडे केली होती.
Thursday, November 14, 2019 AT 08:56 PM (IST)
5 नवी दिल्ली, दि.13 (वृत्तसंस्था) : आयएनएक्स मीडिया प्रकरणी दिल्लीतील राऊज एव्हेन्यू कोर्टाने आज माजी केंद्रीय मंत्री आणि काँग्रेस नेते पी. चिदंबरम यांच्या न्यायालयीन कोठडीत 27 नोव्हेंबरपर्यंत वाढ केली आहे. त्यामुळे तूर्त चिदंबरम यांना कोठडीतच मुक्काम करावा लागणार आहे. चिदंबरम यांच्या न्यायालयीन कोठडीची मुदत आज संपत होती. त्यामुळे त्यांना व्हिडिओ कॉन्फरन्सिंगद्वारे न्यायालयात हजर करण्यात आले असता त्यांची 27 नोव्हेंबरपर्यंत न्यायालयीन कोठडीत रवानगी करण्यात आली. चिदंबरम यांना यापूर्वी 30 ऑक्टोबर रोजी राऊज एव्हेन्यू कोर्टाने 13 नोव्हेंबरपर्यंत न्यायालयीन कोठडी दिली होती. त्यावेळी अंमलबजावणी संचालनालयाने (ईडी) मागितलेली एका दिवसाची कोठडी न्यायालयाने नाकारली होती.
Thursday, November 14, 2019 AT 08:45 PM (IST)
5पश्‍चिम बंगाल, दि. 10 (वृत्तसंस्था) : बुलबुल या चक्रीवादळाने मध्यरात्रीच्या सुमारास पश्‍चिम बंगालमधल्या सागर बेट आणि बांगलादेशमधल्या खेपुपारा या भागात धडक दिली. यामुळे या भागात मुसळधार पाऊस पडत असून आतापर्यंत दोन जणांचे बळी गेले आहेत. सार्वजनिक मालमत्तेचे देखील नुकसान झाले आहे. खबरदारीचा उपाय म्हणून कोलकाता विमानतळ 12 तासांसाठी बंद ठेवण्यात आले होते. याशिवाय किनारपट्टी भागातील एक लाखांपेक्षा अधिक नागरिकांना सुरक्षितस्थळी हलवण्यात आले आहे. पश्‍चिम बंगाल आणि बांगलादेशला या चक्रीवादळाचा मोठा धोका निर्माण झाला आहे. पुढील काही तासांमध्ये बुलबुल चक्रीवादळ रौद्ररूप धारण करण्याची शक्यता भारतीय हवामान विभागाने वर्तवली आहे. ‘बुलबुल’ हे चक्रीवादळ दिवसेंदिवस तीव्र होताना दिसत आहे. ताशी 120 किलोमीटर या वेगाने ते ओडिशा, पश्‍चिम बंगालहून बांगलादेशकडे सरकत असल्याची माहिती हवामान खात्याने दिली. शनिवारी सायंकाळी पश्‍चिम आणि पूर्व मिदनापोर, दक्षिण आणि उत्तर 24 परगणा जिल्ह्यामध्ये वार्‍याचा वेग ताशी 80 ते 90 कि.मी. इतका होता तो ताशी 110 ते 120 इतका वाढण्याची शक्यता असल्याचे हवामान खात्याने म्हटले आहे.
Monday, November 11, 2019 AT 09:01 PM (IST)
1 2 3 4 5 ...
 
© Copyrights 2010 Dainik Aikya.com - All rights reserved.
of
Powered By: