Dainik Aikya - Published from Satara (Maharashtra,India) Published on,
 
Search Tag:     From Date:     To Date:     Section:    
Total Results: 187
5जिनिव्हा, दि. 11 (वृत्तसंस्था) : काश्मीर प्रकरणी जगभरातून पाठिंबा मिळविण्यात अपयश आलेल्या पाकिस्तानला संयुक्त राष्ट्रानेही दणका दिला आहे. भारत आणि पाकिस्तानने हा विषय चर्चेने सोडविण्याचा सल्ला देत संयुक्त राष्ट्राने काश्मीर प्रश्‍नात मध्यस्थी करण्याची पाकिस्तानची मागणी फेटाळून लावली आहे. विशेष म्हणजे भारताने विनंती केली तरच या प्रश्‍नात मध्यस्थी करणार असल्याचे संयुक्त राष्ट्राने स्पष्ट केल्याने पाकिस्तानला मोठा झटका बसला आहे.   संयुक्त राष्ट्राचे सरचिटणीस अँटोनिओ ग्युटेरेस यांना काश्मीरवरून भारत-पाकिस्तानमध्ये असलेल्या तणावाची चिंता आहे. हा तणाव आणखी वाढू शकतो, अशी त्यांना भीती आहे. त्यांनी दोन्ही देशांना चर्चेतून मार्ग काढण्याचे आवाहन केल्याचे ग्युटेरेस यांच्या प्रवक्त्याने सांगितले. मागच्या महिन्यात फ्रान्समध्ये जी 7 परिषदेच्या निमित्ताने अँटोनिओ ग्युटेरेस यांनी पंतप्रधान नरेंद्र मोदी यांच्याबरोबर चर्चा केली होती. पाकिस्तानचे परराष्ट्रमंत्री शाह महमूद कुरेशी यांच्यासोबत सुद्धा त्यांचे बोलणे झाले असल्याची माहिती संयुक्त राष्ट्राचे मुख्य प्रवक्ते स्टीफेन दुजारिक यांनी पत्रकार परिषदेत दिली.
Friday, September 13, 2019 AT 08:49 PM (IST)
5बेंगळुरू, दि. 10 (वृत्तसंस्था) : चंद्राच्या भूमीवर सुरक्षित असलेल्या विक्रम लँडरशी अद्यापही संपर्क होऊ शकलेला नाही, अशी माहिती भारतीय अंतराळ संशोधन संस्थेने (इस्रो) ट्विटद्वारे दिली आहे. विक्रम लँडरशी संपर्क साधण्याचा सर्वतोपरी प्रयत्न सुरू असल्याचेही त्यांनी सांगितले. विक्रम लँडर चंद्राच्या पृष्ठभूमीवर आडव्या स्थितीत पडला असल्याची माहिती सोमवारी इस्रोच्या हाती लागली होती. ऑर्बिटरने पाठवलेल्या छायाचित्रांमध्ये विक्रम लँडर सुरक्षित असल्याचे स्पष्ट झाले असल्याचे इस्रोने स्पष्ट केले होते. विक्रम लँडरची कोणत्याही प्रकारची तूटफूट झाली नसल्याचे या छायाचित्राद्वारे स्पष्ट झाले. यानंतर शास्त्रज्ञांनी विक्रमशी संपर्क साधण्याचे प्रयत्न सुरू केले. 22 जुलै या दिवशी प्रक्षेपण झाल्यानंतर ‘चांद्रयान-2’ 47 दिवसांचा प्रवास करत आणि सर्व अडथळे पार करत चंद्राच्या जवळ पोहोचले होते. 6-7 दरम्यानच्या रात्री विक्रम लँडरसह रोव्हक प्रज्ञान चंद्राच्या पृष्ठभूमीवर उतरले.  मात्र चंद्राच्या भूमीपासून 2.1 कि.मी.च्या अंतरावर असताना विक्रम लँडरशी असलेला संपर्क तुटला.
Wednesday, September 11, 2019 AT 08:44 PM (IST)
जीडीपीतील चढ-उतार हा विकास प्रक्रियेचा भाग 5नवी दिल्ली, दि. 10 (वृत्तसंस्था) : देशातील वाहन उद्योगावर सध्या बीएस-6 बरोबरच ओला-उबर कंपन्यांच्या वाहनांच्या वाढत्या वापराचा परिणाम झाला असल्याचे दिसत आहे, असे केंद्रीय अर्थमंत्री निर्मला सीतारामन यांनी म्हटले आहे. नवी वाहने खरेदी करण्यापेक्षा ओला-उबरच्या वाहनाचा वापर बरा, अशी लोकांची सध्या मानसिकता झाल्याचे दिसत असल्याने वाहन उद्योगासमोर अडचणी निर्माण झाल्या असल्याचेही त्यांनी सांगितले. चेन्नई येथे पत्रकारांशी संवाद साधताना त्यांनी ही माहिती दिली. यावेळी अर्थमंत्री सीतारामन यांनी  जीडीपीतील चढ-उतार हा विकास प्रक्रियेचा भाग असल्याचे म्हटले. तसेच केंद्र सरकार देशभरातील आर्थिक मंदी घालवण्यासाठी प्रयत्नशील असून विकास दर वाढवण्यासाठी उपाययोजना करत असल्याचेही त्यांनी सांगितले. तसेच आगामी तिमाहीत जीडीपीच्या आकडेवारीत वाढ होईल यासाठी सरकार सातत्याने प्रयत्न करत आहे. सरकारने पायाभूत सुविधा क्षेत्रात गुंतवणूकही वाढवली असल्याचे त्यांनी सांगितले.  सरकार वाहन उद्योग क्षेत्रामधील मंदीबाबत गंभीर आहे. ऑटो कंपोनंट इंडस्ट्रीच्या मागण्यांबाबतही विचार केला जात आहेे.
Wednesday, September 11, 2019 AT 08:43 PM (IST)
5नवी दिल्ली, दि. 10 (वृत्तसंस्था) : राष्ट्रवादीचे सर्वेसर्वा शरद पवार यांनी आज काँग्रेसच्या अंतरिम अध्यक्षा सोनिया गांधी यांची दिल्ली येथील 10, जनपथ या निवासस्थानी भेट घेतली. विधानसभा निवडणूक तोंडावर आली असताना ही भेट खूप महत्त्वाची मानली जात आहे. या दोघांमध्ये जवळपास दीड ते दोन तास चर्चा सुरू होती. महाराष्ट्रात विधानसभा निवडणूक कधीही लागू शकते. त्याच संदर्भात सोनिया गांधी यांच्याशी चर्चा करण्यासाठी शरद पवार दिल्ली या ठिकाणी गेले असल्याची चर्चा आहे. या दोघांमध्ये महाराष्ट्रातल्या विधानसभा निवडणुकीत काय करायचे याबाबतचा खल झाला असल्याचे सूत्रांचे म्हणणे आहे. लोकसभा निवडणुकीत काँग्रेस आणि राष्ट्रवादी या दोन्ही पक्षांना भाजपने आस्मान दाखवले. आगामी विधानसभा निवडणुकीच्या तोंडावर काँग्रेस, राष्ट्रवादीचे दिग्गज नेतेमंडळी भाजप-शिवसेनेत प्रवेश करत असल्यामुळे या दोन्ही पक्षांसमोर अस्तित्वाचा प्रश्‍न निर्माण झाला आहे.  त्याचा फटका विधानसभा निवडणुकीत बसण्याची चिन्हं आहेत. या सगळ्या परिस्थितीत निवडणूक, रणनीती या दोन्ही याबाबत दोन्ही नेत्यांमध्ये चर्चा झाल्याचे समजते.
Wednesday, September 11, 2019 AT 08:42 PM (IST)
5जिनिव्हा, दि. 10 (वृत्तसंस्था) : संयुक्त राष्ट्राच्या मानवाधिकारी परिषदेत जम्मू-काश्मीरचा मुद्दा उपस्थित करणार्‍या पाकिस्तानला भारताने सणसणीत प्रत्युत्तर दिले आहे. भारताने पाकिस्तानचे सर्व आरोप खोडून काढले आहेत. पाकिस्तान खोटेनाटे आरोप करत असून भारताने काश्मीरबद्दल संविधानाच्या चौकटीत राहून कायदेशीर पाऊल उचलले आहे, असे विजय ठाकूर सिंह यांनी सांगितले. सामाजिक, आर्थिक समानता आणि न्याय मिळवून देण्यासाठी माझे सरकार प्रगतीशील धोरणात्मक निर्णय घेत असल्याचे  विजय ठाकूर सिंह यांनी सांगितले. भारत आपल्या अंतर्गत विषयांमध्ये कोणाचाही हस्तक्षेप सहन करणार नाही हे भारताने स्पष्ट केले. पाकिस्तान खोटे आरोप करत असून प्रदेशातील जनतेच्या मानवी हक्काच्या संरक्षणासाठी भारत कटिबद्ध आहे, असे परराष्ट्र मंत्रालयाच्या सचिव विजय ठाकूर सिंह यांनी संयुक्त राष्ट्रात सांगितले. पाकिस्तान पुरस्कृत दहशतवादाने जम्मू-काश्मीरचे नुकसान केल्याकडे त्यांनी आंतरराष्ट्रीय समुदायाचे लक्ष वेधले. पाकिस्तान दहशतवादाचे प्रमुख केंद्र असल्याचेही भारताने निक्षून सांगितले.
Wednesday, September 11, 2019 AT 08:28 PM (IST)
1 2 3 4 5 ...
 
© Copyrights 2010 Dainik Aikya.com - All rights reserved.
of
Powered By: