Dainik Aikya - Published from Satara (Maharashtra,India) Published on,
 
Search Tag:     From Date:     To Date:     Section:    
Total Results: 78
डिझेल दरवाढीने एस.टी. भाडेवाढ अटळ 5मुंबई, दि. 22 (प्रतिनिधी) : आधीच तोट्यात असलेले एस.टी. महामंडळ डिझेलच्या दरात भरमसाट वाढ झाल्याने आर्थिक संकटात सापडले असून वाढता तोटा नियंत्रणात आणण्यासाठी येत्या दोन-तीन दिवसांत मोठी भाडेवाढ केली जाण्याची शक्यता आहे. डिझेलच्या वाढलेल्या किमतीमुळे महामंडळाचा संचित तोटा तब्बल दोन हजार 300 कोटी रुपयांवर गेला आहे. कर्नाटक विधानसभा निवडणुकीनंतर पेट्रोल, डिझेलचे दर रोज वाढत आहेत. गेल्या काही दिवसांत हे दर मोठ्या प्रमाणात वाढल्याने महागाई वाढण्याची चिन्हे आहेत. इंधन दरवाढीचा मोठा फटका एस.टी. महामंडळाला बसला आहे. गेल्या वर्षी एस.टी.ला मिळणार्‍या डिझेलचा दर सरासरी 58 रुपये 02 पैसे होता. तो यंदा सरासरी 68 रुपये 39 पैसे झाला आहे. टायर व सुट्या भागाच्या किमती वाढलेल्या असताना इंधनाचे दर प्रतिलिटर 10 रुपये 38 पैशांनी वाढले आहेत. त्यामुळे तब्बल 460 कोटी रुपयांचा अतिरिक्त भार एस.टी. महामंडळावर पडणार आहे. इंधन खर्चात वाढ होत गेल्याने महामंडळाचा संचित तोटा तब्बल दोन हजार 300 कोटी रुपयांवर गेला आहे.
Wednesday, May 23, 2018 AT 09:18 PM (IST)
5रायपूर, दि. 20 (वृत्तसंस्था) : छत्तीसगडच्या दंतेवाडामध्ये नक्षलवाद्यांनी आयईडीचा स्फोट घडवून आणल्यामुळे 7 जवान शहीद झाले आहेत. अन्य दोन जवान गंभीर जखमी झाले आहेत. नक्षलवाद्यांनी जवानांच्या गाडीला लक्ष्य करुन हा स्फोट घडवून आणला असल्याचे बोलले जात आहे शहीद झालेल्या जवानांमध्ये छत्तीसगढ सशस्त्र दलाचे आणि जिल्हा दलातील जवान आहेत. मिळालेल्या प्राथमिक माहितीनुसार, दंतेवाडाच्या छोलनार गावातील ही घटना आहे. यापूर्वी 13 मार्च रोजी नक्षलवाद्यांनी सुकमा जिल्ह्यात शोधमोहीम सुरू असताना सीआरपीएफच्या जवानांवर आयईडीचा स्फोट घडवून आणला होता. यामध्ये 13 जवान शहीद झाले होते. 29 एप्रिलमध्ये एका गावात सार्वजनिक बैठकीसाठी निघालेल्या 29 जवानांच्या ताफ्यावर असाच हल्ला झाला होता. त्यात एक जवान जखमी झाला होता. त्यानंतर, 2 मे रोजी गोरीबंद जिल्ह्यात आईईडी स्फोटात 2 जवान हुतात्मा झाले होते. यावरून नक्षलवाद्यांकडून पोलिसांवरील हल्ले वाढल्याचेच दिसून येते.  महाराष्ट्रातील गडचिरोली जिल्ह्यात पोलिसांच्या सी 60 कमांडोनी नक्षलविरोधी केलेल्या कारवाईत 50 पेक्षा जास्त नक्षलवाद्यांना मारण्यात आले होते.
Monday, May 21, 2018 AT 08:40 PM (IST)
राज्य शासनामध्ये मेगा भरती 5मुंबई, दि. 16 (प्रतिनिधी) : ग्रामीण भागात अत्यावश्यक सेवासुविधा पुरविण्यासाठी संबंधित विभागांमधील रिक्त पदांची भरती करण्याचा महत्त्वपूर्ण निर्णय राज्य शासनाने घेतला आहे. त्यानुसार पहिल्या टप्प्यात राज्य शासनातील 36 हजार पदांची भरती करण्यास मुख्यमंत्री देवेंद्र फडणवीस यांनी आज मान्यता दिली. या संदर्भात अर्थसंकल्पीय अधिवेशनात झालेल्या चर्चेला उत्तर देताना मुख्यमंत्र्यांनी, राज्याच्या प्रशासनातील विविध विभागांमधील 72 हजार रिक्त पदे दोन टप्प्यात भरण्यात येतील, असे जाहीर केले होते. पहिल्या टप्प्यात यातील 36 हजार पदे भरण्यात येणार असून ही पदे भरताना ग्रामीण भागातील प्रशासकीय यंत्रणेचे सक्षमीकरण करण्यास प्राधान्य देण्यात येणार आहे. विशेषत: कृषी आणि ग्रामविकासाशी संबंधित विविध विभागांमधील रिक्त पदे अग्रक्रमाने भरण्यात येतील. शेतीच्या शाश्‍वत विकासासाठी सरकारने विविध योजना जाहीर केल्या आहेत परंतु संबंधित विभागांमधील रिक्त पदांमुळे त्यांची अंमलबजावणी करण्यात अडचणी येत आहेत. ग्रामीण भागात पायाभूत आणि जीवनावश्यक सुविधा देण्यातही अडचणी येत होत्या.
Thursday, May 17, 2018 AT 08:48 PM (IST)
विश्‍वजित कदमांच्या निवडीची औपचारिकता बाकी 5मुंबई, दि. 14 (प्रतिनिधी) : पलूस-कडेगाव विधानसभा पोटनिवडणुकीतील भाजपचे उमेदवार संग्रामसिंग देशमुख यांनी आज आपला उमेदवारी अर्ज मागे घेतला. माजी मंत्री पतंगराव कदम यांच्या निधनामुळे रिक्त झालेल्या या जागेवर त्यांचे चिरंजीव विश्‍वजित कदम हे निवडणूक लढवत असून शिवसेनेने त्यांना आधीच पाठिंबा दिला होता तर भाजपनेही आज माघार घेतली. त्यामुळे विश्‍वजित कदम यांच्या बिनविरोध निवडीची औपचारिकताच आता बाकी आहे. मात्र, पालघर लोकसभा मतदारसंघात भाजपविरोधात शिवसेनेने श्रीनिवास वनगा यांची उमेदवारी कायम ठेवल्याने येथे चौरंगी लढत होणार आहे. लोकसभेच्या दोन व विधानसभेच्या एका जागेसाठी 28 मे रोजी निवडणूक होत असून उमेदवारी अर्ज मागे घेण्याची मुदत सोमवारी संपली. माजी मंत्री व भारती विद्यापीठाचे संस्थापक डॉ. पतंगराव कदम यांच्या निधनामुळे रिक्त झालेल्या पलूस-कडेगाव मतदारसंघात काँग्रेसने त्यांचे चिरंजीव विश्‍वजित कदम यांना उमेदवारी दिली आहे.
Tuesday, May 15, 2018 AT 08:29 PM (IST)
5पाटणा, दि. 13 (वृत्तसंस्था) : सीमेवरील दहशत-वादी कारवाया रोखायच्या असतील तर भारताने पाकिस्तानवर आक्रमण करायला पाहिजे, असे मत योगगुरू रामदेव बाबा यांनी व्यक्त केले. बिहारच्या गया येथे प्रसारमाध्यमांशी ते रविवारी बोलत होते. ते म्हणाले, दहशतवाद्यांना पाकिस्तानमध्ये प्रशिक्षण दिले जाते, ही बाब आता सूर्यप्रकाशाइतकी स्वच्छ आहे. त्यामुळे भारताने हल्ला करून पाकव्याप्त काश्मीर ताब्यात घेतला पाहिजे. दहशतवाद रोखण्यासाठी हा एकमेव मार्ग आहे. तसेच भारताने बलुचिस्तानला स्वतंत्र होण्यासाठी मदतही पुरविली पाहिजे. तेव्हाच पाकिस्तान ताळ्यावर येईल.      दरम्यान, कालच पाकिस्तानचे पंतप्रधान नवाज शरीफ यांनी मुंबईवरील हल्ल्यामागे पाकिस्तानी दहशतवाद्यांचा हात असल्याची कबुली दिली होती.  आम्ही दहशतवाद्यांना आसरा देत नाही, असा दावा कायम पाकिस्तानकडून आंतरराष्ट्रीय व्यासपीठावर केला जातो. मात्र शरीफ यांच्या कबुलीने पाकिस्तानचे पितळ उघडे पडले होते. शरीफ यांच्या वक्तव्याचे राजकीय पडसाद भारतात उमटले होते.
Monday, May 14, 2018 AT 08:39 PM (IST)
1 2 3 4 5 ...
 
© Copyrights 2010 Dainik Aikya.com - All rights reserved.
of
Powered By: