Dainik Aikya - Published from Satara (Maharashtra,India) Published on,
 
Search Tag:     From Date:     To Date:     Section:    
Total Results: 73
5भंडारा, दि. 10 (वृत्तसंस्था) : मध्य प्रदेशातील संजय सरोवराचे पाणी सोडण्यात आल्याने वैनगंगा नदीच्या पाण्याच्या पातळीत प्रचंड वाढ झाली आहे. आज कारधा येथील लहान पुलावरून वैनगंगेचे पाणी वाहत असल्याने या मार्गावरून वाहतूक बंद करण्यात आली. सिहोरा-वाराशिवनी या आंतरराज्य मार्गावरील पुला वरून बावनथडी नदीचे पाणी वाहत असल्याने या मार्गावरील वाहतूकसुद्धा बंद करण्यात आली. भंडारा शहराला लागून असलेल्या ग्रामसेवक कॉलनीतील काही घरांमध्ये पुराचे पाणी शिरले आहे. गोसे खुर्द धरणाचे सर्व 33 दरवाजे दोन मीटरने उघडण्यात आले आहेत. जिल्हाधिकार्‍यांनी पूरस्थितीची पाहणी केली असून वैनगंगा नदीकाठावरील गावांना सतर्कतेचा इशारा देण्यात आला आहे. गेल्या काही दिवसांपासून जिल्ह्यात पावसाची संततधार सुरू असून अनेक भागांमध्ये पाणी साचले आहे. मध्य प्रदेशातील संजय सरोवराच्या खोर्‍यातही जोरदार वृष्टी होत असल्याने या धरणातून पाण्याचा विसर्ग करण्यात आला. या पाण्यामुळे वैनगंगा नदीच्या पातळीत वाढ झाली होती.    परंतु, पुन्हा अतिवृष्टी झाल्याने संजय सरोवराचे 10 दरवाजे 1.85 मीटरने उघडण्यात आले.
Wednesday, September 11, 2019 AT 08:30 PM (IST)
5मुंबई, दि. 8 (प्रतिनिधी) : महाबळेश्‍वरसह परिसरात मागील चार दिवसांपासून मुसळधार पाऊस सुरूच असून या वर्षीच्या हंगामात 300 इंच पाऊस झाला आहे. याबाबत ‘द वेदर चॅनेल इंडिया’ने देखील नुकत्याच केलेल्या ट्विटमध्ये मेघालयातील मॉसिनराम, चेरापुंजीपेक्षा महाबळेश्‍वरात अधिक पाऊस झाल्याचे नमूद केले आहे. या वर्षी येथे आजपर्यंत 7631 मि. मी. पावसाची नोंद झाली आहे. जगात सर्वाधिक पावसाचे ठिकाण म्हणून मॉसिनराम, चेरापुंजी प्रसिद्ध आहे. परंतु या दोन्ही शहरांना मागे टाकत महाबळेश्‍वरने पहिला क्रमांक पटकावला आहे. हवामान विभागाने नुकतीच या बाबतची आकडेवारी प्रसिद्ध केली आहे. या आकडेवारीनुसार यंदा मॉसिनराम शहरात आजपर्यंत साडेसहा हजार मि. मी. पावसाची नोंद झाली आहे. तर महाबळेश्‍वर शहरात साडेसात हजार मि. मी. पावसाची नोंद झाली आहे. तब्बल तेरा वर्षांनंतर 1 जून ते 8 सप्टेंबरअखेर येथे 300 इंच पावसाची विक्रमी नोंद झाली आहे. मागील वर्षी याच काळात येथे 237 इंच पावसाची नोंद येथे झाली होती. कोकण, पश्‍चिम घाटात आणि मध्य महाराष्ट्रात महाबळेश्‍वर हे असे आगळं वेगळं गिरिस्थान आहे, की या ठिकाणी नेहमी सरासरी पेक्षा अधिक पावसाची नोंद होते.
Monday, September 09, 2019 AT 09:02 PM (IST)
5नवी दिल्ली, दि. 6 (वृत्तसंस्था) : लोकसभा निवडणुकीत दारूण पराभवाला सामोरे जावे लागल्यामुळे काँग्रेस नेते मिलिंद देवरा यांनी काँग्रेसच्या मुंबई अध्यक्षपदाचा राजीनामा दिल्यानंतर त्यांच्या जागी माजी खासदार आणि ज्येष्ठ काँग्रेस नेते एकनाथ गायकवाड यांची वर्णी लावण्यात आली आहे. काँग्रेसच्या केंद्रीय समितीने एकनाथ गायकवाड यांची काँग्रेसच्या मुंबई अध्यक्षपदी नियुक्ती करण्यात येत असल्याचे जाहीर करण्यात आले आहे. लोकसभा निवडणुकीतील पराभवानंतर काँग्रेसचे मुंबईचे माजी अध्यक्ष मिलिंद देवरा आणि काँग्रेसचे माजी प्रदेशाध्यक्ष अशोक चव्हाण यांनी पदाचे राजीनामे दिले होते. त्यामुळे त्यामुळे काँग्रेस हायकमांडने काँग्रेसच्या प्रदेशाध्यक्षपदी बाळासाहेब थोरात यांची नियुक्ती केली होती. तर मुंबईच्या कार्यकारी अध्यक्षपदी एकनाथ गायकवाड यांची नियुक्ती केली होती. लोकसभा निवडणुकीनंतर मुंबई काँग्रेसचे अध्यक्षपद रिक्तच होते. अखेर आज हे पद भरण्यात आले आहे. राज्यात गणेश विसर्जनानंतर विधानसभा निवडणुका लागण्याची चिन्हे आहेत.
Saturday, September 07, 2019 AT 08:38 PM (IST)
5मुंबई, दि. 3 (प्रतिनिधी) :  जीडीपी दर अपेक्षेपेक्षा कमी तसेच इतर महत्त्वाच्या क्षेत्रांत मंद गतीने सुरू असलेला विकास याचा परिणाम शेअर बाजारावर झाल्याचे आज दिसून आले. दुपारी सव्वातीनच्या सुमारास सेन्सेक्समध्ये तब्बल 800 अंकांची घसरण होत तो 36,500 वर पोहोचला. निफ्टीतही 24.40 अंकांची घसरण नोंदवून तो 10782.85 वर पोहोचला. सुरुवातीच्या सत्रात सकाळी 10.22 वाजता सेन्सेक्स 413.58 अंकांनी घसरून 36,919.21 अंकांवर व्यवहार सुरू होते. निफ्टीतही 129.30 अंकांची घसरण नोंदवली होती. दरम्यान, उत्पादन क्षेत्रात ऑगस्टमध्ये विक्री घटल्याने शेअर बाजारात निराशा आहे. उत्पादन घटल्याने केलेली गुंतवणूक आणि खर्च यातील नुकसानही अद्याप भरून निघाले नाही. यापूर्वी जूनच्या तिमाहीत जीडीपी दर सहा वर्षांतील निच्चांकीवर पोहोचले होते. ऑगस्टमध्ये वाहन विक्रीच्या आकडेवारीमुळे शेअर बाजारात निराशा आहे. मारुती सुझुकीच्या विक्रीत 33 टक्क्यांहून अधिक घट झाली. टाटा मोटर्सच्या पेसेंजर वाहनांची विक्रीही 58 टक्क्यांनी घसरली आहे. या शिवाय महिंद्रा अँड महिंद्रा, बजाज ऑटोच्या वाहन विक्रीतही घट नोंदवली गेली आहे.
Wednesday, September 04, 2019 AT 08:50 PM (IST)
5मुंबई, दि.3 (प्रतिनिधी)  : काश्मीरला स्वायत्तता देणारे कलम 370 रद्द केल्यानंतर तेथील विकासाला गती देऊन स्थानिकांचा रोष कमी करण्यासाठी केंद्राबरोबरच भाजपशासित राज्यांनीही पुढाकार घेतला आहे. याचाच एक भाग म्हणून महाराष्ट्र राज्य पर्यटन विकास महामंडळाद्वारे काश्मीरमध्ये पर्यटकांसाठी दोन रिसॉर्ट उभारण्याचा निर्णय आज राज्य सरकारने घेतला. केंद्राने जम्मू-काश्मीरला विशेष राज्याचा दर्जा देणारे कलम 370 रद्द केल्यामुळे राज्याबाहेरील लोकांना तेथे जमीन विकत घेण्याचा मार्ग मोकळा झाला आहे. मात्र जोवर स्थिती निवळणार नाही तोवर तेथे अपेक्षित खाजगी गुंतवणूक होणार नाही. त्यामुळे स्थानिकांच्या उपजीविकेचे प्रमुख साधन असणार्‍या पर्यटन क्षेत्राला प्रोत्साहन देण्याचे केंद्राचे प्रयत्न असून त्याला पूरक भूमिका घेताना जम्मू- काश्मीरमध्ये जमीन विकत घेऊन त्यावर दोन रिसॉर्ट बांधण्याची योजना महाराष्ट्र पर्यटन विकास महामंडळाने आखली आहे. काश्मीर खोर्‍यातील पहलगाम येथे एक आणि लेहमध्ये दुसरे रिसॉर्ट बांधण्याचा प्रस्ताव आहे. यासाठी जागा निश्‍चित करण्याचे काम पुढच्या 15 दिवसात सुरू होईल, असे पर्यटन मंत्री जयकुमार रावल यांनी सांगितले.
Wednesday, September 04, 2019 AT 08:25 PM (IST)
1 2 3 4 5 ...
 
© Copyrights 2010 Dainik Aikya.com - All rights reserved.
of
Powered By: