Dainik Aikya - Published from Satara (Maharashtra,India) Published on,
 
Search Tag:     From Date:     To Date:     Section:    
Total Results: 29
5बेळगाव, दि. 18 (वृत्तसंस्था) : काश्मीरमधून कलम 370 रद्द करण्यात आल्याने त्याचा बदला घेण्यासाठी अतिरेकी कर्नाटकात दहशतवादी हल्ला करण्याची शक्यता असल्याने सावध राहण्याचा इशारा केंद्रीय गुप्तचर खात्याने दिला. त्यामुळे बंगळुरू, हुबळी, धारवाड, म्हैसूर, मंगलोर, बागलकोट आणि बेळगाव या शहरांमध्ये पोलिसांनी घोषित केलेला हायअलर्ट दुसर्‍या दिवशीही कायम ठेवला आहे. दहशतवादी हल्ल्याच्या पार्श्‍वभूमीवर या सर्व शहरांमध्ये पोलीस बंदोबस्तात वाढ करण्यात आली असून संवेदनशील आणि अति संवेदनशील भागात विशेष लक्ष ठेवण्यात आले आहे. साध्या वेशातील पोलीस देखील शहरातील अनेक भागात तैनात करण्यात आले आहेत. रेल्वे स्टेशन, बस स्थानकांवर विशेष बंदोबस्त ठेवण्यात आला आहे. चित्रपटगृहे, शॉपिंग मॉल्स, बाजारपेठ, विमानतळ, व्यापारी पेठा आदी ठिकाणी अधिक खबरदारी घेण्याचे आवाहन पोलीस आयुक्त बी. एस. लोकेशकुमार यांनी केले आहे. जनतेने गर्दीच्या ठिकाणी शक्यतो जाणे टाळावे आणि गेल्यास विशेष खबरदारी घ्यावी.
Monday, August 19, 2019 AT 08:45 PM (IST)
5पुणे, दि. 13 (प्रतिनिधी) : गुंतवणूकदारांची फसवणूक केल्याप्रकरणी अटकेत असलेले पुण्यातील प्रसिद्ध बांधकाम व्यावसायिक दीपक सखाराम कुलकर्णी अर्थात डीएसके यांचे बंधू मकरंद कुलकर्णी यांना मुंबई विमानतळावरून अटक करण्यात आली आहे. अमेरिकेत पळून जाण्याच्या प्रयत्नात असताना त्यांना ताब्यात घेण्यात आले. सुमारे अडीच हजारांहून अधिक गुंतवणूकदारांची किमान 230 कोटी रुपयांची फसवणूक केल्याचा आरोप कुलकर्णी बंधूंवर आहे. ‘डीएसके’ कंपनीत मकरंद कुलकर्णी हे प्रवर्तक आहेत. या प्रकरणाची सध्या चौकशी सुरू आहे.    पोलीस मकरंद कुलकर्णी यांचा अनेक दिवसांपासून शोध घेत होते. पण ते सापडत नसल्यामुळे त्यांच्या विरोधात ‘लुकआऊट नोटीस’ काढण्यात आली होती. पहाटेच्या सुमारास अमेरिकेला पळून जाताना त्यांना पकडण्यात आले. पुणे पोलिसांचे पथक त्यांना घेऊन जाण्यासाठी मुंबईला रवाना झाले आहे.
Wednesday, August 14, 2019 AT 08:37 PM (IST)
5मुंबई, दि. 11 (प्रतिनिधी) : कोल्हापूर, सांगलीमध्ये गेल्या सहा दिवसांपासून पूरस्थिती असून बराच भाग पाण्याखाली गेला आहे. महाराष्ट्राच्या मुख्यमंत्र्यांनी पाहणी केल्यानंतर आज केंद्रीय गृहमंत्री अमित शहा यांनी महाराष्ट्रासह कर्नाटकमधील पूरस्थितीची हवाई पाहणी केली. कर्नाटकमधील अलमट्टी धरणामुळे कोल्हापूर, सांगलीसह सातार्‍यापर्यंत पूरस्थिती झाली होती. अलमट्टी धरणातून पाण्याचा विसर्ग न केल्याने महाराष्ट्रातील सीमा भागात पाण्याचा फुगवटा वाढला आहे. यामुळे कोल्हापुरातून जाणारा पुणे-बंगलोर महामार्ग आठ फूट पाण्यात होता. या पूरस्थितीची अमित शहा यांनी हवाई पाहणी केली. यावेळी कर्नाटकचे मुख्यमंत्री येडियुराप्पा उपस्थित होते. दरम्यान, कोल्हापूरमधील महामार्गावरील पाण्यातूनच अत्यावश्यक सेवेचे, इंधनाचे टँकर रवाना करण्यात आले.
Monday, August 12, 2019 AT 08:36 PM (IST)
5मुंबई, दि. 23 (प्रतिनिधी) :  डॉ. पायल तडवी आत्महत्या प्रकरणातील तिन्ही आरोपी महिला डॉक्टरांच्या जामीन अर्जावरील सुनावणी उच्च न्यायालयाने 25 जुलैपर्यंत तहकूब केली आहे. दरम्यान, मुंबई क्राइम ब्रांचने आरोपींविरोधात सत्र न्यायालयात आरोपपत्र दाखल केले. पदव्युत्तर वैद्यकीय अभ्यासक्रमाच्या द्वितीय वर्षात शिकणार्‍या डॉ. पायल तडवीने 22 मे रोजी नायर रुग्णालयाच्या वसतिगृहातील तिच्या खोलीत गळफास घेऊन आत्महत्या केली होती. डॉक्टर हेमा अहुजा (28), डॉ. अंकिता खंडेलवाल (27) व डॉ. भक्ती मेहरे (26) या तिघींनी जातिवाचक शेरेबाजी करून रॅगिंग करत तिला आत्महत्येस प्रवृत्त केले, असा आरोप आहे. या प्रकरणी त्यांना अटक करण्यात आली आहे.  तिघींनी सत्र न्यायालयात जामीन अर्ज दाखल केले होते. मात्र, न्यायालयाने ते फेटाळले होते. सत्र न्यायालयाच्या या निर्णयाविरोधात तिघींनी उच्च न्यायालयात अपिल केले आहे. उच्च न्यायालयाने आज तिघींच्या जामीन अर्जावरील सुनावणी गुरुवारपर्यंत (25 जुलै) तहकूब केली आहे. दरम्यान, मुंबई क्राइम ब्रांचने या प्रकरणी सत्र न्यायालयात आरोपपत्र दाखल केले आहे.
Wednesday, July 24, 2019 AT 08:32 PM (IST)
5धुळे, दि. 21 (वृत्तसंस्था) : राज्यातील अनेक भागांमध्ये पुनरागमन करत दिलासा देणार्‍या मुसळधार पावसाने तिघांचे बळी घेतले आहेत. धुळ्यामध्ये मुसळधार पावसात वीज कोसळून दोन बालकांचा मृत्यू झाला असून ठाणे जिल्ह्यातील भिवंडी येथे वीज कोसळून एका महिलेचा मृत्यू झाला आहे. धुळे आणि भिवंडी येथे वीज कोसळल्यामुळे 4 जण गंभीर जखमी झाल्याचेही वृत्त आहे. धुळे जिल्ह्यातील पाडळदे या गावात झाडावर वीज कोसळली. यावेळी झाडाखाली आसरा घेतलेला पंकज ज्ञानेश्‍वर राठोड (14) याचा जागीच मृत्यू झाला. तर लखन राठोड (6) आणि हितेश राठोड (10) हे दोघे जखमी झाले आहेत. या घटनेत एका म्हशीचाही मृत्यू झाला आहे. धुळे जिल्ह्यातील शिंदखेडा तालुक्यातील खर्दे बुद्रुक येथे दुसरी घटना घडली असून त्यात  दीपाली गिरासे (15) हिचा वीज कोसळल्यामुळे मृत्यू झाला. भिवंडी तालुक्यात वज्रेश्‍वरी रस्त्यावर असलेल्या झिडके गावाजवळ उंबरपाडा या आदिवासी वस्तीच्या ठिकाणी वीज कोसळल्याने शेतात काम करणार्‍या प्रमिला मंगल वाघे या वर्षीय युवतीचा मृत्यू झाला आहे. तर प्रमिला यांच्या आई अलका वाघे (52) आणि बहिणीचा मुलगा विजय अजय बोंगे (4) जखमी झाले.
Monday, July 22, 2019 AT 08:34 PM (IST)
1 2 3 4 5 ...
 
© Copyrights 2010 Dainik Aikya.com - All rights reserved.
of
Powered By: